حوار خاص كيف أعاد النائب محمد علي عبد الفضيل الحياة لمستشفى الغسيل الكلوي بالفنت

"المكان ده كان حلم كبير لأهالينا في الفنت، تعبوا فيه وبنوه بجهودهم، لكن لسنين طويلة فضِل مقفول... رغم إن المرض ما بيرحمش"، بهذه الكلمات بدأ النائب محمد علي عبد الفضيل حديثه عن مستشفى الغسيل الكلوي بقرية الفنت التابعة لمركز الفشن.

وأضاف النائب:

"كنت شايف بعيني معاناة الناس، خصوصًا مرضى الفشل الكلوي اللي بيضطروا يسافروا يوم ويوم لمستشفيات بعيدة علشان جلسة غسيل... وكان لازم نتحرك".

 ما هي أبرز العقبات التي واجهت تشغيل المستشفى؟

"أول حاجة كانت مشكلة الصرف الطبي... ماكنش فيه صرف مخصص للمخلفات، فتم الاتفاق مع هيئة الصرف على إنشاء خزان مؤقت، لحين تنفيذ شبكة الصرف ضمن مشروع حياة كريمة".

"ثاني حاجة كانت الكهرباء، المحول اللي كان موجود قدرته 100 ك.ف.أ، وده مايكفيش، فتم شراء محول جديد 1000 ك.ف.أ علشان يشيل المستشفى بالكامل، ده غير مولد احتياطي بقدرة 300 ك.ف.أ لأي طوارئ. التكلفة كلها تجاوزت 3.5 مليون جنيه، وكل ده علشان أهلنا يستحقوا الأفضل".

 وهل حصلتوا على الموافقات الرسمية؟

"طبعًا، عملنا تنسيق مع الوحدة المحلية والبيئة، ووفّرنا خطاب البيئة، وكمان حصلنا على خطاب الحماية المدنية بعد استيفاء كل الشروط. ده غير إننا غيرنا الأسلاك الكهربائية بالكامل، وركّبنا لوحة ATS جديدة علشان الأجهزة تشتغل بكفاءة عالية ومن غير أعطال".

 ومتى يبدأ تشغيل المستشفى؟

"مديرية الصحة زارت المستشفى 3 مرات لمتابعة التنفيذ، وفيه تواصل مستمر معاهم، وإن شاء الله خلال أيام قليلة جدًا هيتم تشغيله. إحنا شغالين على مدار الساعة علشان نخلي الحلم ده حقيقة".

رسالة أخيرة؟

"أنا مش بشتغل نائب من مكتب، أنا منكم وليكم، وأي مشروع بيخدم الناس البسيطة بيكون على أولوياتي. والحمد لله إن ربنا وفقنا في خدمة أهلنا في الفنت والفشن كلهم. وكل ورقة وكل خطوة موثقة، لأن الشفافية هي الأساس".